Алабуга шәһәренең Спас соборында керәшенчә келәү узды

Татарстан митрополиты священниклары алып барган литургиягә Әлмәт һәм Чистай чиркәве приходларыннан да халык килгән. 

Алабуга чиркәү округыннан иермонах Кирилл (Забавнов); Алла Анасының «Неупиваемая Чаша» тәресе чиркәве настоятеле протоиерей Владимир Иванов; Балтач районы Цепья авылының Изге Троица чиркәве настоятеле иерей Сергий Нечипоренко; Питрәч районының Керәшен Сәрдәсе авылындагы Кодратләр кылучы Николай чиркәве настоятеле иерей Димитрий Сизов; Балык Бистәсе районы Керәшен Казысы һәм Казаклар Чаллысы авылы чиркәүләре священнигы иерей Геннадий Сизов; Тукай районы Мәләкәс авылы священнигы иерей Николай Храмов; Спасс соборы клиригы иерей Михаил Климов катнашкан.

Келәү барышында җыруларны Казан шәһәренең Тихвин чиркәве настоятеле протоиерей Алексий Колчерин җитәкчелегендәге шул чиркәү хоры башкарган.

Иеромонах Кирилл иман әйткәннән соң, протоиерей Владимир Иванов үгет (проповедь) сөйләгән. Келәүдән соң иеромонах Кирилл священникларга һәм прихожаннарга бергәләп келәү иткәннәре өчен рәхмәт җиткергән.

Литургиядән соң уздырылган трапеза вакытында прихожаннар керәшеннәрнең беренче укытучысы Василий Тимофеевны искә алганнар, священниклар белән аралашканнар, аларга үзләренең фикерләрен һәм проблемаларын җиткергәннәр.