Түбән Камада концерт-лекция узачак

4 февральдә Түбән Каманың Халыклар Дуслыгы йортында “Күрсен дөнья минем Халкымны!” дип аталган иҗади программа узачак. Ул җирле керәшен бүлеге тарафыннан Я.Емельянов исемендәге мәдәни үзәкнең “Җакын дуслар җыелышкач” проекты кысаларында оештырыла.

Керәшен бүлеге җитәкчесе урынбасары Эльмира Гильмутдинова хәбәр итүенчә, аерым күргәзмә оештырылачак. Шулай ук, райондагы керәшен ансамбльләре – “Сүрәкә”, “Серле мәләнчек”, “Баш чишмә”, “Ак түтиләр”, “Җирекле моңнары”, “Асыл нәсел” һәм аерым башкаручылар чыгышы да көтелә.

Кичәнең бер өлешен концерт-лекция дип атаганнар. Чөнки рекреацион программадан тыш, районда керәшеннәр белән бәйле эзләнү эшләренең нәтиҗәләре турында да сөйләнәчәк һәм аерым экспедицияләрдән видео-репортажлар күрсәтеләчәк.

Шулай итеп, Түбән Кама керәшеннәре айлыгы ачылып җибәреләчәк.