Түбән Камада «Керәшен дигән халык бар» дигән темага кичә уздырылды

Ул «Өмә көе»нә төшерелгән клибны караудан башланып китте. Лицей директорының тәрбия эше буенча урынбасары Эльза Багдиева кичәне ачып, лицейга килүләре, биредә белем алучы укучыларны керәшеннәрнең культурасы белән таныштырулары өчен җирле керәшен оешмасы җитәкчесе Тамара Баһаветдиновага һәм керәшен активистларына рәхмәт белдерде. 

Үз чиратында, Түбән Кама керәшен оешмасы җитәкчесе урынбасары Эльмира Гыйльметдинова, үзара хезмәттәшлекнең алга таба да дәвам итәчәгенә өмет белдереп, 31нче лицейга «Белый гусь, летящий к солнцу» китабын бүләк итте. Китапта лицей турында да язылганын телгә алды.

Лицейда белем алучылар каршында «Сүрәкә» керәшен халык фольклор ансамбле, керәшен яшьләренең «Җиз кыңгырау» ансамбле чыгыш ясады. Җиңүнең 80 еллыгы уңаеннан оештырылган бу кичәне алып баручыларның керәшен Геройлары турында сөйләгәннәрен дә укучылар кызыксынып тыңлап утырдылар. Керәшен милли киемнәре үзенчәлекләре белән дә таныштылар. 

— Мастер-класслар да файдалы булгандыр, дип уйлыйм. Керәшен биюе алымнарын өйрәткәндә, укучылар урыннарында утырып кына калмадылар. Малайлар, хәтта, алга чыгып, биеп тә алдылар. Укучылар милли киемнәр турында да күп беләләр икән. Гаҗәбе, барысы да җырлады, карап кына утыручы булмады, — дип сөйләде Эльмира Гыйльметдинова.