“Туганнарның ачык җөзләре” – фотоларда

Быел үзенең 30 еллыгын бәйрәм итәргә әзерләнә торган Түбән Кама керәшен оешмасы  халкыбыз мәдәнияте өчен кирәкле әнә шундый зур эшкә тотынган. 

Бүгенге көндә җирле керәшен оешмасына  Балчыклы авылыннан элгәреге фотоларны туплап, китереп тапшырганнар инде.

Шулай ук, нигезен булачак Түбән Камага биреп, халкы тулысынча шәһәргә яки Красный Ключка күченгән Чәбия авылы керәшеннәре дә альбомнарында сакланган фотоларны китергәннәр.

Шәһәр төзелгән вакытта үзенең бер урамын саклап кала алган Актүбә керәшеннәре дә кадерле истәлекләрен алып килгәннәр.  

 Райондагы керәшен авылларыннан тарихи фотолар күргәзмәсе өчен карточкалар җыю әле дәвам итә. Аларны халык үзе китерә. Еллар агышы саргайткан, кәгазе уңып искергән фотоларны заманча технология ярдәмендә яңартуга  керешелгән инде.

Түбән Кама төбәгендәге керәшен авыллары тарихын чагылдырган “Туганнарның ачык җөзләре” дигән фотолар күргәзмәсе киләчәктә  халкыбыз тарихын өйрәнү өчен дә зур ярдәмлек булыр.