Покрау җыены күңелле узды

Шәһәрдәге Халыклар дуслыгы йорты бер көнгә керәшен җортына әйләнде дисәң, һич арттыру булмас. Бу көнне биредә керәшен фольклор ансмабльләре, үз халкының йолаларын һәм бәйрәмнәрен белүчеләр җыелды.

Благочинный Алексий Колчеринның, җирле керәшен җәмгыяте җитәкчесе Тамара Баһаветдинованың чыгышларын халык игътибар белән тыңлады. Керәшеннәрне Покрау бәйрәме белән котларга Түбән Кама мэры урынбасары Марина Камелина да килгән иде. Халыклар дуслыгы йорты җитәкчесе Васил Хафизов та чыгыш ясап, керәшеннәрнең бердәмлеген, активлыгын билгеләп үтте.

Покрау җыенында Түбән Кама шәһәренең “Сүрәкә” керәшен халык фольклор ансамбле белән беррәттән, Красный Ключ поселогыннан – “Баш чишмә”, Җирекле авылыннан – “Җирекле моңнары”, Олы Атыдан “Ак түтиләр” ансамбльләре керәшен җыруларын яңгыраттылар. Җиреклеләр әле Покрау туе йоласын да күрсәттеләр. Вероника Боярова белән Елена Бикеева чиркәү җырларын башкардылар. “Асыл нәсел”нең дуэтын һәм Мария Савельеваның “Көнбагыш” җыруын да тамашачы яратты.