Казан Григорий Родионов белән хушлашты – фоторепортаж

7 сентябрьдә Казан шәһәренең Г.Камал исемендәге татар дәүләт академия театры каршындагы мәйданда халык язучысы Гәрәй Рәхим (Григорий Родионов) белән хушлашу  уздырылды.

Аны Татарстан мәдәният министры Ирада Әюпова татарча алып барды. “Иҗат һәм тормыш юлы үз халкына тугрылык билгесе булган күренекле язучыны, дәүләт эшлеклесен соңгы юлга озатабыз” дип әйтүче министр, иң беренче итеп, сүзне  Дәүләт советы председателе урынбасары Марат Әхмәтовка бирде.

“Бу хушлашулар күпкә китте әле. Йөзек кашы булырдай шәхесләребез китеп бара” дип әйтүче Марат Әхмәтов карендәшебез Григорий Родионовның 17 ел дәвамында    Татарстан  Дәүләт советының мәгариф, мәдәният, фән һәм милли мәсьәләләр комитетында  хезмәт иткәне хакында сөйләде. Татарстан Президенты Рөстәм Миңнеханов, Дәүләт советы председателе Фәрит Мөхәммәтшин һәм депутатлар исеменнән, Григорий Родионовның туганнары һәм гаиләсенең  кайгысын уртаклашты.

Татарстан Дәүләт советы депутаты, Татарстан Язучылар союзы председателе “гомере буе  карендәшләренә тугры булып яшәде”дип әйтүче Ркаил Зәйдулла үз остазының рус телендә язылган соңгы әсәре “Кряшенские демэки”нең дә керәшеннәргә багышланганын телгә алды. Аңа Гәрәй Рәхим псведонимын Хәсән Туфан биргәнен,  аның шагыйрь генә булмыйча, әдәбиятның бөтен жанрларын да иңләгәнен ассызыклады.

Татарстанның халык шагыйре Равил Фәйзуллин: “Керәшеннәр алар талантлы халык бөтен яктан да. Анда төрле өлкәдә дөнья тоткан һәм дөньяны алып бара торган бик зур шәхесләр бар. Әдәбият өлкәсенә килсәк, Тукайлар заманында Яков Емельянов булган. Ул – безнең татар поэзиясендә үз урыны булган зур шәхес. Ә инде безнең заманга килгәндә, Григорий Васильевич исемен атап үтәр идем. Керәшеннәрдә булган яхшы гадәтләрнең – ул телдә булсын, ул сәнгатьтә булсын – яхшы якларның югалмавын теләде, үз халкының да, гомумән, бөтен татар халкының патриорты булды”, – дип искәртте үзенең Гөргөри дәдәй белән хушлашу сүзендә.

“Гөргөри дустыбызының  якты дөньядан китүе – татар халкы өчен, керәшен халкы өчен бик зур югалту. Ул бик зур шагыйрь, прозаик, җәмәгать эшлеклесе, сәясәтче, әмма халык әле аның бик күп эшләрен белеп бетерми. Безгә аның турында язарга, сөйләргә кирәк әле... Искиткеч затлы шәхес, гаҗәеп ихлас күңелле, шул хәтле җор телле иде. Ул янына барып кергәч, барлык кайгыларың онытыла, ул яшәү дәрте бирә иде. Аның белән сөйләшкәннән соң эшлисе, яшисе килә иде”, – дип сөйләде Татарстанның халык шагыйре Разил Вәлиев һәм сүзен Григорий Родионов шигыре белән тәмамлады:

Сиңа калдырам, туган ил,

Барын, барын, барын да...

Лениногорский районының Федотовка авыл җирлеге башлыгы Валентина Павлова үзенең хушлашу сүзендә “Григорий Васильевич безнең районда бердәнбер керәшен авылы булган Федотовканы үзенең үткен каләме, иҗаты, хезмәте белән күпләргә танытты”, – дип әйтеп үтте.

Иң соңыннан, Григорий Родионовның улы Давыт хушлашуга килгән кешеләргә рәхмәтен җиткерде һәм: “Әти үзен зур кешегә санамады. Юбилеена газета, журналларда  үзе турында язмалар басылганны күргәч, “кара, мине халык белә икән, ничек зурлаганнар”, дип шатланды. Рәхмәт, әти, безгә бик яхшы әти булдың. Шулай тиз китеп баруың кызганыч”, – дип җаннарны елатты.

Карендәшебезне соңгы юлга озатуда Я.Емельянов исемендәге мәдәни үзәк хезмәткәрләре, танылган керәшен шәхесләре (Николай Дунаев, Людмила Белоусова, Артур Поляков, Галина Казанцева, Лидия Әхмәтова, Аграфена Васильева, Олег Фазылҗанов һәм башкалар), Камал театры артистлары, язучылар, министрлык вәкилләре катнашты.

Григорий Родионовның кызыл канәфер чәчәкләренә төрелгән табутын Габишево авылы зиратына алып киттеләр, ул үзенең улы Кубрат янындагы мәңгелек йортына җирләнде.