Нихәл, чибәркәйләр?

Дәвамы. Башы газетаның 18 (310), 20 (312), 21 (313) саннарында. Безнең сайттан да укый аласыз.

− Ул елны мин 8 нче классны гына тәмамлаган идем. Владимир төп мәктәбенең "Талир тәңкә" ансамбле солисткасы буларак, миңа Мамадыш районы хакимиятенең мәдәният бүлегеннән, шушы конкурста катнашырга тәкъдим ясадылар. Риза булдым. Керәшеннәр турында язылган китапларны укыдым, йолалар, авылыбыздагы өлкән әбиләрдән борынгы җырлар, иманнар өйрәндем, киемнәр турында белем тупладым, "Туганайлар" газетасының төрле елларда чыккан басмаларын кабат барлап чыктым. Беренче урын яулавымны мин гаилә ансамблебез, "Талир тәңкә" ансамбле (аның җитәкчесе әнием − Елена Алексеевна, аккомпаниаторы, әтием − Николай Петрович) уртак хезмәте дип саныйм. Барысына да мин зур рәхмәтле. Конкурс миңа керәшен халкының тарихы, авылымның йолалары турында, күренекле шәхесләре хакында тирәнтен белем туплауда ярдәм итте. Конкурста откан призга яңа керәшен күлмәге тектердек һәм пианино сатып алдык. Алар миңа бүгенге көндә Алабуга мәдәният һәм сәнгать колледжында белем алу өчен иң кирәкле әйберләр. Укытучым Людмила Гатауллина белән керәшенчә җырлар, биюләр өйрәнәбез, төрле этник конкурсларда катнашабыз. Училищедагы "Айбагыр" ансамбленә дә теләп йөрим. Миңа монда уку бик ошый. Июнь аенда Санкт-Петербург шәһәрендә милли җырларыбызны җырлап кайттым. Керәшеннәрнең тарихи мирасын, җыруларын төрле төбәкләрдә яңгыратып, халыкны сөендерүем, рухи баета алуым белән мин бик шат.

- Мин ул вакытта Яр Чаллы педагогия колледжында укый идем. Бу бәйгедә катнашып, керәшен халкының тарихы, гореф-гадәтләре, җырлары белән якыннан таныштым. Конкурста катнашучы кызларның барысы белән дә горурланам! Беренче урынга биргән акчага машина йөртү таныклыгы алырга укыдым һәм яңа керәшен күлмәге тектердем. Хәзерге көндә шул күлмәк белән сәхнәләрдә чыгыш ясыйм. Колледжның музыка бүлеген кызыл дипломга тәмамлап, Казанга күчеп килгәч тә, тиз арада дуслар таптым. Бүгенге көндә Казан федераль университетында белем алам, 22нче музыка мәктәбендә балаларны курайда уйнарга өйрәтәм. "Бәрәкәт" керәшен яшьләре оешмасында - активист. "Айбагыр" этнолагеренда педагог-организатор вазифаларын да бик яратып үтим. Миңа барысы да бик ошый.