Зәй, Сарман, Чистай, Тукай районы керәшен авылларының этимологиясе

Дүрт Мунча – Зәй районындагы авыл. Топонимист Р.И. Хаҗиев фикеренчә, аның исеме «дурт» һәм «мунча» компонентларыннан тора.

Кабан-Бастрык – Зәй районындагы авыл. Аның исеме «кабан» зоологик термины белән бәйле, дип яза Р.И. Хаҗиев «Татарстанның көньяк-көнчыгыш Кама аръягы ойконимиясенә тарихи-лингвистик анализ» диссертациясендә. Ә менә икенче компоненты «бастрык» кайдан килеп чыгуы хакында, тикшеренүче комментарий бирми.

Зычебаш(Зичәбаш) – Зәй районындагы авыл. Танылган татар топонимисты Г.Ф. Саттаров фикеренчә, Зичә елгасы үзенең исемен кайчандыр биредә яшәгән удмуртлардан алган, аларның телендә «ӟичы» төлке дигәнне аңлата. Димәк, Зичә – төлке елгасы. Ә Зичәбаш авылы исеме ике сүзне кушу юлы белән барлыкка килгән: «ӟичы+баш», монда елганың башы булуы аңлатыла.

Куян – Минзәлә районындагы авыл. Авылның исеме ыру атамасына бәйле, куян дигән сүздән килеп чыккан, – дип яза Р. И. Хаҗиев.

Ләке – Сарман районындагы авыл. Р. И. Хаҗиев язганча, атаманы «ләки» - «вьюн» зоологик термины белән бәйлиләр. Геннадий Макаров версиясе буенча, «Ләке» атамасы лыко төшенчәсеннән килеп чыккан, чөнки бу авыл халкы Мамадыш районының Юкәче авылыннан күчеп килгән, ул шулай ук “Лыко – юкә” төшенчәсе белән бәйле.

Түбән Чыршылы – Сарман районындагы авыл. Атама ике компоненттан тора, анда «аскы» якта урнашу урынын күрсәтә, ә «чершилы» – «чыршы» фитонимик терминына барып тоташа.

Бахта – Чистай районындагы авыл. Максим Глухов раславынча, “Бахта” сүзе «бәхет» дигәннән алынган.

Борды – Тукай районындагы авыл. Авылның исеме “бор” сүзенә “ды” кушымчасын кушу юлы белән барлыкка килгән. Бор–ды, бор–а, бор–ма, бор–ылыш.