Кичү буйлары

Кичү буйларыннан безләр җөрибез,

Ай, вак кынайлар да чыбык әле сындырып.

Ваккынайлар чыбык, чыбык тал чыбык,

Ай, безләр көттек лә сезне әле талчыгып.

Сары атлар гына җиктем сатуга,

Ай, сары майлар да ла эчтем катуга.

Бик күп адәмнәрнең лә исе китә,

Ай, сезнең белән лә безнең татуга.

Кичүнең дә буйлары ла күк томан,

Ай, Кичү дә буйларында ла күп тормам.

Томан күтәрелми лә көн ачылмый,

Ай, бер җырламый җөрәк лә басылмый.

Балык Бистәсе районы Шомырбаш авылында Ф.Даниловтан язып алынган