Елена Григорьева-Даниловадан яңа шигырь

ӨЙРӘТМӘГЕЗ!..

Өйрәтмәгез! Мин юлларны үзем сызам!
Шул юлларда бар шатлыгым, күргән казам...
Буяуларын сайлап манам сурәтләрем,
Сүзләр үреп, мин, тормышның үзен язам!

Бик күп булды акыллылар, өйрәткәннәр-
«Ярдәм» диеп, ялган юлны күрсәткәннәр...
Минем хакта, «астан» гына, сүз йөрткәннәр!..
Әйтмәгәнне,«әйтте» - диеп, «күперткәннәр»!..

Туу, яшәү-зур могҗиза-кыска мизгел,
Гомер берәү! Сулыш кабып ашыгабыз...
Тар кысалар ирек бирми киңәергә,
Бәргәләнеп ашкынабыз. Фаш булабыз!..

Зинһар өчен, өйрәтмәгез! Үзем беләм!
Җиңел димим- мин түгелдер «белеп туган».
Яшь аралаш елмаюым тик бер җиңү-
Тагын бер көн, тәҗрибәмә «элеп куйган»!

Кемнәр әйтә, җиңел диеп ерып бару?
Авырлыгын кем үлчәгән, кем иңләгән?..
Я, кайсыгыз җөръәт итәр? Кемнәр оста?-
Бары бер көн!-Мин эшлисе Кул тимәгән!
Күрсәтегез, өйрәтегез-ни килмәгән!