Көрәшче Евгений Бутаков: «Спорт мастера булмыйча китмим»

10 декабрьдә Әлмәт шәһәрендә яшүсмерләр арасында көрәш буенча дөнья, Россия һәм Татарстан чемпионы, Татарстанның спорт мастеры Булат Вәлиев истәлегенә багышланган «Танефть» Кубогына бөтенроссия турниры узды. Зәй районының Югары Баграж авылы егете Евгений Бутаков үз үлчәү авырлыгында 3нче урын яулады. Инде күп төрле ярышларда җиңүләре булган шушы батыр егетнең үзенә чыгып, көрәшкә мәхәббәте һәм планнары турында сораштык.

Уң яктан өченче – Евгений Бутаков

Евгений көрәш белән 10 яшеннән шөгыльләнә икән. Атнасына 3 тапкыр, бер дә калдырмыйча, "Зәй" спорт мәктәбенә тренировкаларга йөри. Остазы – Рөстәм Зыятдинов төрле яшьтәге асыл егетләрне шушы спорт төре серләренә дә, чын ирләр булырга да өйрәтә, аларны бер команда итеп туплый. Ул "Зәй" командасын республика күләмендә генә түгел, Россия һәм дөнья турниларына да алып чыга икән. 

Евгений 16 яшен тутырган, тиздән мәктәпне тәмамлап, һөнәр сайларга кирәк булса да, спорттан китәргә җыенмый. "Уңышларым инде күп. Тик "спорт мастеры" исемен алырга өлгермәдем, ә бит аласы килә. Шуңа омтылачакмын", – ди көрәшче.