Зинаида Пестрова: әбиемнең киеме - милли каталогта

«... Телдә, музыкада, гамәли сәнгатьтә ата-бабаларының борынгы гореф-гадәтләрен саклап калган өчен, без күп яктан керәшеннәр алдында бурычлы...».М. Ш. Шәймиев

Керәшеннәрнең үзләренә генә хас гореф-гадәтләре, йолалары, тел үзенчәлекләре, кием-салым, бизәнү әйберләре бар. Миндә дә дәү әбием Храмова Анастасия (Начтый әби") Михайловнадан (1896 нчы елгы) калган керәшен хатын-кызларының өс киеме һәм бизәнү әйберләре саклана. ("Традиционный костюм народов Казанского Поволжья. lI Том "  дип аталган каталогта әбиемнең дә өс киеме булу минем өчен бик зур горурлык). Бу әйберләрне миңа әбием Черкеева Александра Семёновна (Анастасиянең кызы, 1916 нчы елгы) бирде. Мин инде үземнең оныгыма(аңа алты яшь, алтынчы буын) мирас итеп калдырачакмын. 

Авыр ачлык, сугыш елларында бу хәзинәне саклап калганнары өчен Начтый әбием белән Санук әбием алдында баш иям.

Сүрәкәләләр чиктем киргесез, 
Күреп чиккәннәргә биргесез. 
Сайлап ярны мин сөймәдем, 
Сайлап сөйгәннәргә биргесез. 

Сүрәкәләләр чиктем исәпләп, 
Дүртти почмакларын пичәтләп. 
Әйтәсе сүземне әйтми калдым, 
Алдагы көнемне исәпләп. 
Мин үзем керәшен киемен бәйрәмнәрдә чыгыш ясаганда киям. ("Баш Чишмә" фольклор ансамбленең яңа костюмнары әбиемнең киеме үрнәге буенча тегелде).

Укучым, Григорьева Даниэла белән керәшен киеме тарихы темасы буенча бик күп гамәли конференцияләрдә катнашып призлы урыннар алдык. (3 нче фото, Даниэла өстендә әбиемнең өс киемнәре). 

  Минем әнинең икетуган тутасы, Палук түти  кунакларны бүгенге көндә дә милли кием киеп каршы ала (4 нче фото). 

Милли бәрәмнәребездә, үзебезнең керәшен  киемнәребезне кияргә тырышыйк. Ул безнең культура. Безнең матурлыгыбызны, байлыгыбызны күрсеннәр. 

(5 нче фото Тукай районы, Мартыш,  6 нчы фото Түбән Кама районы Түбән Афанас, 10 нчы фото Олы Аты авылы киемнәре)