Татарстанда 1 июльдән яңа штраф барлыкка килергә мөмкин

Татарстанда 2025 елның 1 июленнән теркәлмәгән этләр өчен штрафлар үз көченә керергә мөмкин. Штраф күләме 2 меңнән 4 мең сумга кадәр булачак. Әлеге закон проектын ТР Дәүләт Советына карау өчен республика Министрлар Кабинеты чыгарган.

Документ ТР Административ хокук бозулар кодексына үзгәрешләр кертүне күздә тота. Эт хуҗаларына күпфатирлы йортларның гомуми файдалану урыннарында һәм янәшәдәге территорияләрдә хайваннарны тоткан өчен, шулай ук хайваннар мәҗбүри теркәлү үтмәгән өчен штраф салыначак. Кабат хокук бозу очрагында, әгәр эт штраф салынганнан соң теркәлмәсә, штраф суммасы 5 мең сумга кадәр артачак.

Әгәр закон проекты кабул ителсә, беркетмәләр төзү һәм мондый хокук бозулар буенча эшләрне карау Татарстан Министрлар Кабинетының Баш ветеринария идарәсе тарафыннан башкарылачак.

Документ нигезендә, әлеге закон хайваннар белән эш итү өлкәсендә хокукый җайга салуны яхшыртуга һәм хайваннарны һәм хайваннар белән үзара хезмәттәшлек иткәндә гражданнарның хокукларын яклауга юнәлдерелгән.

Шәһри Казан