Мамадыштан Татьяна ПЕТУХОВА: «Урагай»да җаным белән ял итәм»

Язмышыңа язылса

Татьяна Петухова гаиләдә 5нче бала булып туа. Аның әтисе Сергей Абрамов гармунчы булса, әнисе Анастасия — авылның оста җыручысы. Бу сәләт балалары Татьянага да күчкән. 

— Безнең әни 3 телдә матур итеп җырлый иде: татарча, русча, украин телендә (бәләкәй вакытта Донбаста яшәп алганнар, шунда украин телен өйрәнгән). Үзем 8нче-9нчы класста укыганда җыр конкурсларда катнаша башладым, тавышым көчле иде. Ә 10нчы класста укыганда мәктәпкә күрше Зур Арташ авылыннан, армиядән яңа гына кайткан Аркадий музыка укытучысы булып урнашты. Аның тәэсире булган, күрәсең, тормышымда җыр зур урын алды, — дип сүзен башлады әңгәмәдәшем.

Бәләкәйдән җырлап үскән кыз, Албай мәктәбен тәмамлагач, җыр, сәнгать буенча китәргә уйлый. Тик язмышы аңа башка сынаулар әзерләп куйган була.

— Без әтине бик иртә югалттык. Әни ялгызы 8 бала белән тол калды. Мәктәптән соң культура буенча китәргә теләсәм дә, әти урынына калган бертуган дәдәм Григорий җибәрмәде. Үзенчә, мине төпле белем алсын дигәндер, — дип сөйли Татьяна.

Кыз авылда кала, бер ел фермада эшли. Укытучысы Аркадий аның янына еш кына килеп йөри, ике арада мәхәббәт кабына, өйләнешәләр. Альбина исемле кызлары туа.

— Бәхетле генә яшәп ятканда Аркадий авариягә очрап үлде. 1 яшьлек бала белән калдым. Укырга да кирәк иде. Казан педагогия училищесына кереп, тәрбияче һәм татар теле укытучысы белгечлеге алып чыктым. Албайга кайтып, мәктәпкә эшкә урнаштым. Музыка укыттым, интернетта тәрбияче булдым. Ялгыз калгач, мәктәпкә күчтем диярлек. Иртә китәм, төнлә генә кайтам. Бөтен буш вакытымны эш белән юанып уздырдым. Авылда кызлар клубка чыгалар, ә мин өйдә утырам. Әни, жәлләп, «синең рәхәтләнеп вечерда йөрер чагың, ә син — өйдә», дип елый иде. Мин аңа җавап итеп: «Минем менә матур кызым үсеп килә, борчылма», — дип юата идем.

Тормыш үз җае белән барганда, ул Комазан Башыннан Андрей Петухов исемле егет белән таныша. Аның белән гаилә корып, Мамадышка күченә. Башта — балалар бакчасында, аннары шәһәрнең коррекция мәктәбендә тәрбияче булып эшли.

— Беренче елларны бик авыр булды. Андагы балаларны күреп, өйгә кайткач «булмый, эшли алмыйм» дип елый идем. Шулай бервакыт ирем «эшли алмасаң кит» дип катырак әйтеп ташлады, ахрысы, бер этәргеч булды, үземдә көч табып калдым. Шулай итеп, 25 ел әлеге мәктәптә эшләдем. 

Миңа калса, мондый җирдә эмоциональ яктан көчле кешеләр генә эшли ала торгандыр. Ә иң мөһиме — балаларны ярату. Татьяна Сергеевнада әлеге сыйфатларның икесе дә бар.

— Бер ияләнеп, кереп киткәч, үз балаларың кебек. Алар шундый чиста күңелле, акыллы балалар. Хәзер дә күрсәләр килеп кочаклап алып эндәшәләр үземә, — дип тыныч кына әйтеп куйды ул.

Урак аенда оешкан «Урагай»

Мамадышка күченгәч тә мәдәният бүлеге җитәкчесе Степан Спиридонов белән танышкан Татьяна Петухова культура өлкәсенә башы белән чума дисәң дә була: Мамадышта узган концертларда чыгыш ясый, район авыллары буйлап оештырылган коцертларда катнаша һәм керәшен ансамбленә йөри башлый.

— 2001 елда, Мамадыш районы мәдәният йорты карамагында «Урагай» халык фольклор ансамбле оешкач, беренче көннәреннән үк шунда җырлый башладым. Башта солист булсам, соңгы 8 елда — ансамбльнең җитәкчесе. 2021 елда ансамбльгә халык исеме бирелде, — дип «Урагай» белән таныштыра башлады ул.

Ансамбльгә исем уйлап табу да кызыклы булган. Август ае. Урак өсте. Бергәләп уйлый торгач, «хәзер урак ае бара, әйдәгез „Урагай“ дип кушыйк», дигән фикергә киләләр. 10 кешедән торган ансамбльнең үз җырулары, үз уңышлары, үз тамашачысы бар. 

— Ансамбльдә — төрле һөнәр ияләре. Хәзер инде мәдәният йортыннан кайтып та кергән юк (көлә). Репертуарны үзебез туплыйбыз, сәхнәләштергән йолаларның сценариен үзем язам. «Кияү мунчасы» дигән йоланы дәдәмнең туенда күргән идем, шуны сәхнәләштердек. Мамадышта узган һәр концертта чыгыш ясыйбыз. 2 тапкыр Белоруссиядәге халыкара конкурста, Чиләбе өлкәсендәге «Арумысыз, туганнар» фестивальләрендә катнаштык, ел саен Питрауда чыгыш ясыйбыз. Ирем эшемне аңлый, чөнки концертлар гел кичке якта була, ерак юлга чыксак, төнлә генә кайтып керәбез. Яшьлектәге хыялымны тормышка ашырып яшим. Әлеге ансамбльдә җаным белән ял итәм, арыганлыкларым бетә, — дип сүзен тәмамлады Татьяна Сергеевна.