Казан укучылары «Бөек Җиңү» олимпиадасында катнаша алалар

Олимпиада өч этаптан тора. Беренчесе 27 февральдә старт ала. Анда геройларга, батырлыкларга, төп сугышларга һәм Бөек Ватан сугышы тарихындагы мөһим даталарга багышланган сораулар бар. Икенчесе 24 мартта башлана. Катнашучыларга тематик сорауларга җавап биреп кенә калмыйча, эссе да язарга туры киләчәк. 6 майга планлаштырылган финал этабында да балаларны иҗади бирем көтә.

Катнашу өчен проект сайтында теркәлү кирәк, дип хәбәр иттеләр шәһәрнең мәгариф идарәсендә. Шунда ук олимпиада турында нигезләмә бастырылган. Җиңүчеләр Мәскәүдә Кызыл мәйданда Җиңү парадын карау мөмкинлеге алачак.

Моннан тыш, укучыларга иҗади конкурста үз көчләрен сынап карарга тәкъдим итәләр. Ике номинация бар — «Җиңү йөзләре» (үз гаиләсеннән герой белән рәсем ясарга кирәк) һәм «Яшь полководец» (бала 1941–1945 еллардагы теләсә кайсы бөек полководец турында иҗади хезмәт яза ала).

Татар-информ