Георгий Ибушев турында — Газинур Фарухшин: «Аның шигырьләре — үзе җыр»

Татарстанның атказанган артисты Газинур Фарухшин сәхнәгә чыгып, Георгий Ибушев сүзләренә Илгизәр Исламов көй язган «Әнкәй»не җырлады. Бу җыр тудырган хисләр турында һәм, шулай ук, яшьлек дусты Георгийга бәйле истәлекләрен сөйләде:

— Георгийның шигырьләре — үзе җыр. Аның җырга әйләнгән өч куплетлы «Әнкәй» шигырендә ике генә урында «әнкәй» дигән сүз бар. Ә бөтен җирдә әнкәйнең уйлануы икәнен күңел сизеп тора. Әнкәйләр турында шулай күңелгә үтәрлек итеп язганы өчен, рәхмәт аңа. Без Жора белән 1981 елның 1 сентябрендә очрашкан идек. Бер тулай торакта, Георгий — 4нче катта, без 1нче катта тордык. Ул балалар бакчасында «ночной директор» булып эшләде. Бер көтү халык ияргән моңа, нидер сөйли-сөйли, эшкә бара. Кайтканда тагын шул ук хәл, бер көтү халык Жорага ияреп кереп китә. 30 елдан артык бер йортта яшәдек, күрешмәгән көн юк иде.