Микродулкынлы мич серләре: кабыгын чистарту өчен помидорны 30 секундка мичкә куеп алыгыз

Туганайлар, 10 гыйнвар 2025 - 08:00

111

Микродулкынлы мичнең ризык әзерләү, җылыту, ит җебетү белән беррәттән, без белмәгән күп кенә башка осталыклары да җитәрлек.

Микродулкынлы мич серләре: кабыгын чистарту өчен помидорны 30 секундка мичкә куеп алыгыз

Макарон һәм карабодайны салфетка каплап җылытсаң, алар кипми.
Пицца җылытканда янына сулы стакан куегыз.
Бутерборд тәмле булсын өчен, аны тәлинкәнең уртасына түгел, кырыена куялар. Шул чакта ул тигез җылына.
Дымлы чүпрәккә төреп куйсаң, микродулкынлы мичтә иске ипи дә яңара.
Күптән савытта торып кибеп беткән тәмләткечләрне 15 секунд җылытсаң, алар да яңара.
Тураганда, суган күзгә кермәсен өчен, аны 30 секундка мичкә куеп алыгыз. Аннары беркем дә еламас.
Сарымсакны 30 секундка мичкә куеп торсаң, чистартырга җиңел була.
Кызыл чөгендерне микродулкынлы мичтә пешерү өчен, полиэтилен пакетка салып, 15 минут мичтә тотыгыз. Аннары 5 минут суытыгыз да, пакетны ачыгыз.
Кабыгын чистарту өчен, помидорны 30 секундка мичкә куеп алыгыз. Аннары 2-3 минут суыткач, кабык җиңел әрчелә.
Микродулкынлы мичтә йомырка тәбәсе дә пешереп була. Тәлинкәне мичтә җылытыгыз да атланмай белән майлагыз, өстенә йомырканы сытып салыгыз. Тәлинкәне 1-3 минутка мичкә куеп торсагыз, тәбә әзер!
Бәрәңгене юка телемләп турап, пергамент кәгазе җәелгән тәлинкәгә тезегез дә, бераз май, тоз, тәмләткечләр сибеп, мичкә куегыз. 3 минуттан бәрәңге телемнәренең кире ягын әйләндерегез. Тагын 3 минуттан чипсы барлыкка килә.
Юылган банкаларны юеш килеш микродулкынлы мичкә зур көчәнештә 1,5-2 минут тотсаң, банкалар кыза, су кибеп бетә. Банкалар тулысынча кибеп беткәч, мичне сүндерегез. Шулай итеп банкалар стерильләштерелә.
Әгәр керфек буяу өчен тушь кипсә, аның капкачын ачып, микродулкынлы мичкә куегыз. Янына бер стакан су да урнаштырыгыз. 10 секундтан тушь өр-яңа кебек булыр.
Өйгә тәмле ис чыксын өчен, ваниль, корица кебек тәмләткечләрне куеп, микродулкынлы мичне 15 секунд эшләтегез. Шуннан соң өйгә хуш ис таралыр.