Нихәл, чибәркәйләр?

− "Керәшен чибәре" титулын алган елны мин музыка училищесы белән Казан дәүләт мәдәният һәм сәнгать университетының театр факультетын тәмамладым. Беренче курстан алып Салават Фәтхетдиновта эшләдем һәм аның классында укыдым. Конкурста җиңүем мине бөтен керәшен дөньясына танытты. Радио, телевидениегә чакырдылар, журналистлар һәрвакыт минем белән кызыксынып, язып торалар.

Әти-әнием, туганнарым, танышларым минем белән горурланалар. "Мисс Татарстан" иҗтимагый оешмасы җитәкчесе Изольда Сахарова да үзенең группасына чакырды. Бу бәйге мине бөтен яктан ачты, танытты, дисәм дә, ялгыш булмас. Үземдә бик күп көч, халкым турында саллы гына белем тупладым. Сәхнәдә күптән булуыма карамастан, "Керәшен чибәре"ндә катнашу миңа зур тәҗрибә бирде. Бәйгедә откан призга яңа җырлар яздырдым. Хәзерге вакытта "Бәрмәнчек" дәүләт фольклор ансамбле концертларын алып баручы булып эшлим. Шуны да әйтеп үтәсем килә, конкурста җиңү, кемнәрнеңдер булышлыгы ярдәмендә түгел, ә үземнең тырышлык нәтиҗәсендә яуланды. Йола күренешен күрсәтү номинациясендә булышканнары өчен, чиксез рәхмәтемне Кайбыч районы, Иске Тәрбит авылы (әтиемнең туган авылы) "Сәүдияр" фольклор ансамбленә җиткерәм.