Тәмле дә, файдалы да

Тәм-том яратмаган кеше юктыр ул. Ә инде ул тәм-том дигәнең кан тамырларын, йөрәк-кан тамырлары һәм нерв системасын ныгытырга да ярдәм итә икән, тагын да яхшырак. Ә аны һәркем үзе ясый ала, әлбәттә инде, әгәр дә ялкауланмаса...

Инжир (10 данә), кара җимеш (10 данә) һәм йомшак күрәгәне (50 данә) ит тарткычтан чыгарабыз. 5 чәй калагы сыек бал кушып, әйбәтләп болгатабыз.

Бу тәмле җимеш вареньесын 2 ай дәвамында һәр кич аз-азлап ашыйбыз. Аңа кадәр бетсә, тагын ясарга була.

* * *

Лимонны (3 данә) юып, кабыгы белән бергә блендерда ваклыйбыз (башта орлыкларын алып ташларга онытмагыз). 20 данә урман чикләвеге төшен төябез. Шуларны бергә кушып, 5 аш калагы сыек бал салып болгатабыз. Суыткычта 3 көн тотабыз.

Бу тәмле һәм файдалы вареньены көн дә 3әр чәй калагы ашыйбыз.