Әтиле-кызлы Япаевлар республикакүләм конкурста җиңгән

Менделеевск районының Иске Гришкин авылы мәдәният йорты директоры Виктор Япаев кызы ева белән "Әти белән бергә" ("Вместе с папой") республикакүләм конкурста катнашкан. 

Мария һәм Виктор Япаевлар гаиләсендә ике бала үсә. Яшьләрнең икесе дә иҗат сөючән һәм халык мирасы өчен җан атучылар булганга, балаларын да шундый итеп тәрбияли. 

Әтиле-кызлы Япаевлар конкурска матур видео әзерләп җибәргәннәр. Видеодан аларның кашыкта, гармунда, флейтада, фортепианода һәм җырлаулары күренә. Нәни кыз әле дөрес итеп уйный белмәсә дә, әтисеннән карап, тырышып-тырышып кечкенә гармунының төймәләренә баса. 

– Безнең гаилә – тормышын иҗат белән бәйләүче бишенче буын. Аеруча үз халкыбызның бай мирасын яратабыз. Балаларыбызга кечкенәдән үк иҗатка мәхәббәт уятырга тырышабыз, – ди әти кеше.

"Әти белән бергә" конкурсында әтиле-кызлы дуэт "Гаилә традицияләре" номинациясендә беренче урын алганнар.

Иске Гришкин мәдәният йорты