Солдатка ник баралар?

Бүгенге яшьләрнең хәзерге армиягә шикләнеп караулары берәүгә дә сер түгел. Сәбәбе - хәрби хезмәтнең элеккеге авторитетын югалтуында. Вузларда эленке-салынкы гына йөрүче егетләрне дә хәзер шуның белән генә куркыталар. "Укыйсың килмәсә, әнә юлың туп-туры күн итекле армиягә, анда күпкә "рәхәтрәк", янәсе. Тик, кем әйтмешли, карачкы образында булу хәрби хезмәтнең йөзен бер дә бизәми. Ни дисәң дә аның төп максаты - хәрби хәрәкәтләр, сугышлар була калса, тиз арада хәрби көчләрнең сафын арттыра алырлык резерв әзерләү.

Солдатка алынучыларны бүген өч төргә бүлеп атарга була икән. Шуларның күпчелеге - хәрби билет өчен генә килүчеләр. Чөнки шушы кызыл китапчыктан башка чит илгә юл ябык, бүгенге көндә эшкә урнашуы да, гаилә корып тыныч кына яшәве дә авыр. Алардан азга гына калышучылар - "бәйләнчек" военкомнан качып котыла алмаганнар. Бары шулардан соң гына - үзләре теләп армиягә китүчеләр. Бүгенге көндә дәүләтнең "рекрут"ларны төрле юллар белән "погонлы агай"лар карамагына тапшырырга тырышуы армия хезмәтенең "престиж"ын бер дә арттырмый кебек. Ни хәл итәсең, Ватанны саклау - һәр ир-егетнең изге бурычы, дисәк тә, аның чыннан да шулай икәнлеген армия сафларында булганнар гына ныклап торып аңлый шул.

- Армиядә булмыйча, илне сакларга әзер булуың турында бернинди сүз дә булырга мөмкин түгел, - ди Менделеев районы Сәйтәк авылы егете Денис Данилов.

Денис (сулдан өченче) солдат дуслары белән

Ул бүгенге көндә Мари Эл республикасының Йошкар-Ола шәһәрендә, артиллерия кораллы көчләрендә хезмәт итә. Әле узган көз генә үзе теләп призывник булган Денисның кайтырына бер ай чамасы гына вакыт калган. Ижевск шәһәре аграр-совхоз техникумының өченче курсында укыганда китеп бара ул. Кайту белән укуын дәвам итәргә, кулына диплом алгач, полициягә эшкә урнашырга ниятләп тора. Без аның белән "Вконтакте" социаль челтәре аша элемтәгә кердек.

- Денис, бары бер ел гына хезмәт итү азрак түгелме? Солдат бит кайсы да булса өлкәдә ел азагына гына белгеч булып өлгереп җитә торгандыр?

- Аз дип уйламыйм. Бездә өйрәнүләр киңәйтелгән программа буенча алып барыла. Бер ел эчендә дә күп нәрсәгә өйрәнергә мөмкин.

- Кайберәүләр, солдат бары хәрби хәзерлек буенча гына шөгыльләнергә тиеш, ә себерке, швабра тотып җыештыру, күлмәк якасы тегү кебек эшләр вакытны бушка уздыру, дип саный…

- Бу ялкаулар сүзе. Физик хезмәтнең әле беркемгә дә зыян иткәне юк.

- Армия телендә "дедовщина" дигән сүз дә бар бит әле. Бирегә килгәнче үк техника, компьютер, электроника ише нәрсәләр белән дус, ягъни һәр яктан "мобиль" булганнарга тимиләр, диләр. Бу шулаймы?

- "Дедовщина" бөтенләй юк бездә. Ә "мобиль" булуга килгәндә - анысы хак. Башы эшләгәннәрнең, билгеле, авторитеты зуррак. Армия наданнарны сөйми.

- Денис, хәрби хезмәт срогын тәмамлап килүче тәҗрибәле солдат буларак әйт әле, армиядә хезмәт итү кирәкме? Әле генә чакырылучыларга нәрсә әйтер идең?

- Армия ул - зур тормыш мәктәбе. Җаваплылыкка, хәрби дисциплинага, төгәллеккә өйрәтеп кенә калмый, һәр солдатның характерын да корычтай ныгыта. Ничек, нинди юл белән - анысы мөһим түгел. Хәрби хезмәттән куркырга кирәкми.

Чыннан да, Денисның сүзләрендә ир-егетлек, үз-үзенә ышаныч ярылып ята. Өзек-өзек аралашкан аз гына вакыт эчендә дә аның туганнар-дуслар, туган җир кадере, тормыш кыйммәте кебек төшенчәләрнең асылын аңлавын чамалавы кыен булмады. Тиздән ул да Ватан алдындагы бурычын намус белән үтәп, Ходайның һәр бирмеш көнендә улының исән-сау кайтуын теләүче әнисе Елизаветаның йөз аклыгы, туганнары, авылдашларының горурлыгы булып кайтып та җитәр.