Миңнеханов: Татарстан хәрби операция зонасына 1,5 млрд долларлык гуманитар йөк җибәрде

Республиканың барлык муниципалитетлары да эшкә кушылды, аларның берсе дә читтә калмады, дип белдерде Татарстан Республикасы Хөкүмәте Йортында узган традицион киңәшмәдә республика Рәисе Рөстәм Миңнеханов.

«Шулай ук безнең хәрбиләр хезмәт иткән хәрби частьләргә ярдәм итү, гуманитар ярдәмне турыдан-туры махсус хәрби операция зонасына җиткерү, Лисичанск шәһәренә ярдәм итү буенча эш алып барыла. Гомумән алганда, республика муниципалитетларыннан гомуми суммасы 1,5 миллиард долларлык гуманитар йөк җибәрелгән», – дип сөйләде республика җитәкчесе.

Ул искәрткәнчә, күп кенә район башлыклары махсус хәрби операция зонасына йөкләрне үзләре озатып барган. Барлык предприятиеләр, хакимият органнары, эшмәкәрләр дә мөмкин кадәр ярдәм күрсәтә. «Бу процесста катнашкан һәркемгә зур рәхмәт», – диде Миңнеханов.

ТИ