Исәннәрнең кадерен белик

Раиса Григорьевна Тимофеева истәлекләрен кызыксынып укып барам. Ул истәлекләрдә олы җырчының үзе турындагы мәгълүмат белән бергә, татар культурасының никадәр танылган шәхесләре турында яңалык бар.

Илһам Шакиров, Усман Әлмиев, Александр Ключарев, Әлфия Авзалова кебек күренекле кешеләр белән турыдан-туры аралашырга туры килә аңа. Керәшен җыруын беренче тапкыр дөньяга чыгарган ветеран җырчыбызга карата игътибар бармы соң? Үзе белән телефоннан сөйләшкәч, күңелләр төшеп китте. Раиса Григорьевна тормышыннан зарланмый, сәламәтлектән башка аңа әллә ни кирәк түгел инде. Тик һаман да шул керәшен җыруларын нотага салып бер китап чыгаручы табылмаганга күңеле борчыла. Миндә зур теләк - үтенеч бар иде: "Туганайлар"да басылган истәлекләрне кечкенә генә китапчык итеп чыгарып булмасмы? Шушы эшкә алынучы табылмасмы? Раиса Григорьевна бик дөрес әйтә: бәйрәмнәрне зурдан кубып үткәрергә меңнәр табалар, рухи байлыгыбызны туплап бастырырга акчалары юк. Болай булмый бит инде, җәмәгать... Исәннәрнең кадерен белик.