Зәй районы тәрбиячеләре керәшенчә бии

Алар фестивальнең беренче көнендә – визитка, икенче көнендә – җыр, өченчесендә исә бию осталыгы буенча  сәләтләрен сынаганнар.

Әлеге  иҗат фестивалендә “Салават күпере” бакчасы тәрбиячеләре дә катнашканнар, талант ияләре җырлау белән беррәттән, төрле халык биюләрен дә башкарганнар. Оксана Коронова, Венера Алексеева, Гөлнара Гыйльманова һәм Екатерина Тарасованың артистларча оста итеп керәшен биюен башкаруына тамашачылар да, жюри да югары бәя биргән.

Алина Гончарова (фотода – уңнан беренче) җитәкчелегендәге “Салават күпере”ндә эшләүче хезмәткәрләр Татарстанда, аерым алганда Зәйдә яшәүче төрле милләт вәкилләренә, аларның мәдәниятенә һәм йолаларына, бәйрәмнәренә бертигез карап, үзләре тәрбияли торган балаларның да  милләттара дуслык-татулык кадерен белеп үсүләре өчен тырышалар.