Зәйле София Акатьеваны 90 яшьлек юбилее белән котладылар

15 ноябрьдә авылдашлары София Акатьевага 90 яшь тулды.

Юбилярны туган көне белән авыл җирлеге башлыгы Зиннур Мөхтәров, район мәдәният йортының автоклуб  хезмәткәрләре һәм авыл мәдәният йортының "Керәшен моңы"фольклор коллективы котладылар.

София Ивановнага чын күңелдән ныклы сәламәтлек, якыннарының игътибарын һәм ярдәмен, иминлеген һәм озын гомер теләп, бүләк тапшырдылар.

Аның тормышы ил тормышы белән тыгыз бәйләнгән. Бөек Ватан сугышы, сугыштан соңгы авыр еллар— искә алырлык һәм горурланырлык нәрсәләр аның тормыш биографиясендә бик күп. София Иванованың балачагы, үсмер вакытлары авыр елларга туры килгән. Тормышның авыр, михнәтле чорын күргән буын ул. Әйе, ул буынның барысы да диярлек михнәт күреп үскән, кечкенәдән авыр эшләрдә эшләгән, тамагы туярлык ризык та күрмәгән. Һәркайсыбызга Ватанга мәхәббәт, бердәмлек, әхлак һәм бурычка тугрылык кебек сыйфатларны София Акатьева кебек өлкән буын кешеләреннән алырга кирәк.

Фәннур Миникаев, Зәй офыклары

Фото: Якты Күл мәдәният йортыннан