Югары Пәнәчедән Мария апа Шакирова әле дә сәхнәдә, ул күпләргә үрнәк

Мария апа безнең авылга фельдшер-акушер булып  килгән беренче көннән бирле гел сәхнәдә. Ул авыл клубына үзешчән сәнгатькә йөри башлагач, ул вакытларда  халык белән мәдәни агарту эшләрен алып барган укытучы Кашшаф абый Хәмитов: “Мариянең  безгә килүе бик яхшы булды, хәзер спектакльләргә артист эзләп йөрисе юк”,- дип шатлана. Чөнки Мария апа бик матур җырлый, рус, татар телләрендә яттан сәнгатьле итеп шигырьләр укый.

Мария апа хәзер өлкән яшьтә булса да, аның энергиясе бүген дә яшьләргә биргесез. Ул әле дә сәхнәдән төшми, һәр үткәрелгән чарада я җыр, я озын  шигырь сөйләп катнаша. Шулай ук китапханәдә иң күп китап укучы да Мария апа.

Узган ел октябрь аенда  үзешчән һәм профессиональ нәфис сүз осталары арасында "Татар сүзе" республика конкурсы булды.  Әлеге конкурста Мария апа Муса Җәлилнең “Соңгы хат” шигыре, Фәтих Кәримнең “Кыңгыраулы яшел гармун” поэмасы белән катнашты. Оештыручылардан Мария апага Рәхмәт хаты килде. Ул хатны авыл мәдәният йортында халык алдында зур горурлык белән тапшырдык. Мария апага киләчәктә дә шулай актив, хәзерге яшьләргә үрнәк булып калуын телибез.

Дамирә Шәрифуллина, китапханәче.

Тулырак: http://zainsk-rt.ru/news/ya%D2%A3alyiklar/yugary-pnchedn-mariya-apa-shakirova-le-d-skhnd-ul-kplrg-rnk