"Туй җоласы"на - диплом

Азнакайда быел бишенче тапкыр уздырылучы «Чатыр тауда җыен" фольклор фестивале 4 июль көнне төрки халык тарихын, гореф-гадәтләрен киләчәк буынга күрсәтергә, тапшырырга теләгән фольклор коллективларын үзенә җыйды. Быелдан фестиваль халыкара исемен алып тагын бер башка күтәрелде. Фестивальдә Азнакай, Әлмәт, Түбән Кама, Бөгелмә, Сарман, Питрәч, Чирмешән, Апас, Ютазы, Баулы, Арча, Тукай районнары һәм Башкортстан, Чуашстан республикаларыннан, Самара төбәгеннән, Кырым һәм Төркиядән дә коллективлар катнашты.

Фестиваль инде елдагыча "Чатыр тау" башында "Чатыр тау җиле" театральләштерелгән тамаша белән башланып китте. Тик ял паркында үтәсе кичке чыгышлар, һава торышы бозылып китү сәбәпле, культура йортында дәвам итте. Бу үзгәреш азнакайлыларны да, килгән кунакларны да борчымады. Яшьләрне уздырып җырлаган, биегән өлкәннәрне күрү үзе бер күңелле иде.

Түбән Кама шәһәреннән катнашкан "Сүрәкә" халык фольклор ансамблебез "Керәшеннәрдә туй җоласы" номерларын күрсәтеп диплом һәм истәлек бүләкләргә ия булды.