Татарстанда ял көннәренә кадәр яшенле яңгырлар булачак

Татарстанның Гидрометеорология үзәге киләсе берничә көнгә һава торышы фаразын төзегән. Аның нигезендә, республикада көннәр атна дәвамында яңгырлы булачак.

Сишәмбе һәм чәршәмбе көннәрендә Татарстанда һава торышы актив тирәнәя торган циклонның тыл өлеше йогынтысында формалаша.

6 июнь 18.00 сәгатьтән 8 июнь 6.00 сәгатькә кадәр республикада яшенле яңгырлар һәм көчле җил көтелә. Җилнең тизлеге кайбер урыннарда секундына 26 метрга җитәргә мөмкин, шул исәптән Казанда да. Төнлә һава температурасы +7..+14 гардус аралыгында булыр.

7 июнь көнне көндез +15..+20 градуска кадәр җылыта, 8 июньдә көндезен җылылык +12..+17 градус кына булыр дип фаразлана.

Пәнҗешәмбе, 9 июньдә, циклон төньяк-көнчыгышка китә. Синоптиклар бераз яңгыр фаразлый. Төнлә температура - +7..+14 градус, ә көндезен - +18..+23 градус көтелә.

Җомга һәм шимбә көннәрендә шулай ук яңгыр һәм яшенле явым-төшем булырга мөмкин, дип фаразлый синоптиклар. Көндез һава температурасы +19..+25 градуска кадәр күтәрелә, диелә хәбәрдә.

ТИ

Фото: unsplash.com