Татарстанда 20 декабрьдән янгынга каршы махсус режим кертеләчәк

20 декабрьдән Татарстанда янгынга каршы махсус режим кертеләчәк. Тиешле карарны ТР Премьер-министры Алексей Песошин имзалаган. Бу турыда "Татар-информ" хәбәр итә.

Документ нигезендә, 1-3-нче класслы пиротехника җиһазларын куллану тыелачак, билгеленгән территорияләр, бенгаль утлары һәм хлопушкалар бу очракта искәрмә булып торачак. Бу турыда Казан мэриясе хәбәр иткән. Пиротехниканы сәнәгать, транспорт инфраструктурасы объектлары (автомобиль юллары искәрмә булып тора), ягулык-энергетика комплексы (шул исәптән линияле) чикләреннән 500 метр ераклыкта, торак-коммуналь хуҗалык, авыл хуҗалыгы, кешеләр күпләп була торган объектлар, автомобиль юллары, шәхси йортлар чикләреннән 30 метр ераклыкта, шулай ук күпфатирлы торак йортлардан 30 метр ераклыкта куллану тыелачак.

Янгынга каршы режим вакытында янгын куркынычсызлыгы таләпләрен бозган өчен административ штрафлар физик затларга — 2 меңнән 4 мең сумга кадәр, вазыйфаи затларга — 15 меңнән 30 мең сумга кадәр, эшмәкәрләргә (юридик затны рәсмиләштермичә) — 30 меңнән 40 мең сумга кадәр һәм юридик затлар өчен 200 меңнән 400 мең сумга кадәр артачак.

Янгынга каршы махсус режим 9 январьга кадәр дәвам итәчәк.