Ташкирмәнгә курсантлар килде

Лаеш районы Ташкирмән авылы халкы быел Рождество бәйрәмен Казан танк училищесы студентлары белән бергә каршылады. Рождество, барлык христианнар кебек, курсантлар өчен дә көтеп алынган бәйрәм. Храмга, бәйрәм келәвенә 86 курсант һәм офицерлардан торган төркем чаң тавышы астында килеп керде.

Яшь хәрбиләрне рухи яктан баету белән озак еллар инде хәрбиләр белән берлектә Казан епархиясендә хезмәт итүче отец Виталий Беляев эшли. Әлеге бәйрәмгә дә Ташкирмән авылы чиркәвенең настоятеле вазифаларын да башкаручы Виталий атакай курсантларны үзе дәшкән булып чыкты. Курсантлар һәм хәрбиләрнең төп дини бәйрәмнәр - Рождество, Пасхада келәүләрдә катнашуы инде традициягә әйләнеп бара.

Курсантлар шундый көтелгән, изге бәйрәмнәрдә бик теләп катнашалар. Офицерлар да соңгы елларда курсантларның Ходай йортларында ешрак булырга тырышуларын билгелиләр.

Казан митрополиясе пресс-службасы материалларыннан