“Сәяр”ләр - фестиваль бизәкләре

Фестивальне Татарстан Республикасы Яшьләр эшләре һәм спорт министрлыгы булышлыгы белән Татарстан халыклары Яшьләр Ассамблеясе оештырды.

Быелгы чарада милли-мәдәни яшьләр оешмаларыннан 127ләп вәкил катнашты. Керәшеннәр исеменнән Питрәч районы Керәшен Сәрдәсе авылыннан “Сәяр” халык ансамбле солистлары – Айдар Маннапов, Маргарита Петрова, Алёна Яковлева, Анна Иванова барды.

Фестивальнең беренче көнендә Болгар шәһәренең тарихи урыннарында мавыктыргыч экскурсия оештырылды. 5 май көнне делегатлар өч номинация буенча чакырылган остазлар белән мастер класслар узды, белем туплады. Остазларның берсе “Питрау чибяре”, Казан филармониясе артисты Марина Карпова булды.

6 май көнне фестивальнең гала-концерты гөрләде. Нәтиҗәләр буенча “Сәяр” халык ансамбле вокал номинациясендә өченче урынны алды.

Бүген, 7 май көнне, фестивальнең катнашучылары Спас районыннан Казан шәһәренә кайтты. Монда традиция буенча, М. Горький исемендәге үзәк күңел ачу һәм ял паркында Билгесез солдат һәйкәленә чәчәкләр салу чарасы үтте.