Сәвәләйдә ачык һавада балалар өчен күргәзмә оештырганнар

2023 елны “Укытучы һәм остаз елы” дип игълан итте. Шуны истә тотып, күп кенә авылларның мәдәният йорты һәм китапханә хезмәткәрләре балалар белән төрле чаралар үткәрәләр.

Бу – уку елы дәвамында арыганнарны бетерү, яңа көч туплау, сәламәтлекне ныгыту, балаларның иркенләп бер-берсе белән аралашуы өчен дә җайлы.
Зәй районының Сәвәләй авылы мәдәният йорты хезмәткәрләре болай хәбәр иттеләр: “Без ачык һавада укытучыларга багышланган китап күргәзмәсе оештырдык.
Күргәзмәгә килгән укучыларга төрле эчтәлекле китаплар тәкъдим иттек. Кайбер китапларны узара кычкырып укыдык. Күбрәк китап укырга, укытучыларны хөрмәт итәргә кирәклеген аңлаттык”, – диделәр.
Җәй көне ата-аналар балаларын яңа урыннарга алып чыгарга, әби-бабасында ял иттерергә, диңгез буена алып барырга тырышалар. Су коену, саф һавада йөрү, әби-бабайга бакча эшләрендә булышу яңа уку елына яңа көчләр тупларга мөмкинлек бирә. Шул ук вакытта китаплар уку, күргәзмәләргә йөрүне дә онытырга кирәкми.