Надежда Токранова: "Олы көнгә төрле юллар үтеп, Һәркем чыга бер үк офыкка"

 Олы көн❤
Олы көннең олы шатлыгын шул,
Күңелемнән теләп җуймаска.
Һәркем белән барам уртаклашып,
Үземә дим, артык булмаска.

Олы көн бит , айдан артык көтеп,
Бәхетләргә безне китергән.
Чиксез җиңеллек һәм рәхәтлекне,
Күңелләргә илтеп җиткергән.

Олы көнне көттем, сабыр гына,
Ходаемнан сорап сабырлык.
Ташламады, инде ташламасын,
Рәхмәтеннән мәхрүм калырлык.

Ел да көтәм, ел да куркып кына,
Олы көнгә илтер юлларны.
Бизмәннәргә салып үлчи барам ,
Башка кергән төрле уйларны.

Олы көнгә төрле юллар үтеп,
Һәркем чыга бер үк офыкка.
Коткаручы безне Ходай гына ,
Менә шуны мәңге онытма!