Мөслимнән Лидия Егоровага Россия Сәламәтлек саклау министрының гармотасы бирелде

12 май көнне Казанда Халыкара шәфкать туташлары көне уңаеннан, тантана узган. Чара ТР Сәламәтлек саклау минитры Марсель Миңнуллинның котлавыннан башланган. Шулай ук, ул яхшы эш күрсәткән хезмәткәрләргә тармак бүләкләрен тапшырды. Мөслим районының Керәшен Шураны авылы фельдшеры Лидия Егорова Россия Сәламәтлек саклау министры Михаил Мурашконың Почет грамотасы белән бүләкләнде.

Карендәшебезнең сәламәтлек саклау тармагында эшләвенә 50 елдан артып киткән. 

–  Әйтерсең, кичә генә училише бетереп эшли башладым. Ә уйлап карасаң, 1 апрельдә 50 ел тулган икән. Нишләптер, ул елларның үткәне сизелмәде дә. Эшләдем дә эшләдем инде. Хәзер инде фельдшер-акушерлык пунктындагы урыныма кеше юк, авылга яшьләр кайтмый.  Безнең чорда уку йортын бетергәч, мәҗбүри эшләтәләр иде. Минзәлә училищесын тәмамлагач, телибезме-юкмы – анысын сорап тормадылар, эшкә юллама буенча җибәрделәр... Безгә 5  ел саен сертификат бирәләр. Соңгысының срогы беткәнче ике ел ярым бар әле. Шул елларны эшләп бетерергә җыенам, – дип үзенең  уйлары белән уртаклашты Лидия Васильевна.

Газетабызның 25 май санында Лидия Егорованың тормыш сынаулары, могҗизалары турында зур язма басылачак.