Мәләкәстә өлкәннәрне котладылар

Салкын көзнең искиткеч матур даталарының берсе - Өлкәннәр көне. Бу көнне без өлкән буынны - барлык якын кешеләребезне котлыйбыз.

Өлкәннәребез хөрмәтенә Тукай районының Мәләкәс авылы мәдәният йортында мул бәйрәм табыны һәм концерт оештырылды. Мәктәп укучылары әби-бабалары каршында бик матур чыгыш ясадылар, - дип Лидия Фартдинова хәбәр итә. Ел дәвамында үзләренең юбилейларын билгеләп үтүчеләрнең һәрберсенә котлау сүзләре җиткерелде.

Дустанә атмосферада, тәмле чәй табыны артында бу көнне катнашучылар үзләре дә җырладылар, шатлыклары һәм борчулары белән уртаклаштылар, хәл-әхвәл сорашып рәхәтләнеп аралаштылар.

Чараны оештыручылар катнашучыларга игътибар һәм яхшы кәеф бүләк иттеләр, озак елларга ныклы сәламәтлек, якын кешеләренең хөрмәтен тоеп яшәүләре, бәхет һәм иминлек теләделәр.

Барлык кунаклар да күңелле ял итеп күтәренке кәеф белән таралыштылар.