Хуҗа Хәсәннән Орловлар гаиләсе чишмә буенда өмә уздырганнар

Чишмәләрне чистарту, төзекләндерү һәм тәрбияләп тору - саваплы эш. Хуҗа Хәсәндә яшәүче Ирина һәм Владимир Орловлар, балалары белән бергәләп, авыл башындагы чишмә тирәсен чистарткан. Бу хакта безгә шул авылда яшәүче Анна Матвеева хәбәр итте. Ирина да, Владимир да “Август-Кайбыч” җәмгыятендә эшли, кызлары Элина Хуҗа Хәсән мәктәбенең 8 классында укый, уллары Матвей балалар бакчасына йөри.

- Бу чишмәгә халык күп йөри. Суны чиләк-көянтә белән дә, зуррак савытларга тутырып, мотоблок һәм машина белән дә ташыйлар. Кызганыч, чишмә тирәсе чүплек оясына әйләнгән иде. Югыйсә, авылыбызда айга ике тапкыр чүп җыялар бит, – диде Анна. – Хәтта шул чишмә янында машиналарын юарга батырчылык итүчеләр дә бар. Чистартканнан соң, чишмә тирәсе ялт итеп калды. Җыештыру гына түгел, чисталыкны саклау да мөһим. Авылдашларыбыз Орловларның хезмәтенә хөрмәт белән карап, изге урынны бүтән андый аяныч хәлгә төшермәсәк иде”.

"Кайбыч таңнары"