“Карендәшләр” керәшен җыруы һәм биюе ансамбле турында кызыклы фактлар

“Карендәшләр” керәшен җыруы һәм биюе ансамбле 2015 елда Менделеев муниципаль районының Сәйтәк авылы клубы каршында оештырыла. Ансамбльга 15 яшьтән 66 яшькәчә 10 кеше йөри. 

Коллективның составы укучылардан, төрле һөнәр ияләреннән һәм Сәйтәк авылының пенсионерларыннан тора. Ансамбль фольклор жанрында эшли, максаты - район халкы арасында керәшен мәдәниятен популярлаштыру, гореф-гадәтләрне һәм йолаларны саклау һәм яңарту.

Карендәшләр” керәшен җыруы һәм биюе ансамбле күп кенә район, республикакуләм фестивальләрдә һәм конкурсларда катнашып, тамашачылар арасында зур популярлык казанды. Район дәрәҗәсендәге бер генә чара да “Карендәшләр ”ансамбле чыгышыннан башка узмый диярлек.

Ансамбль коллективы Менделеевск районының башка иҗат коллективлары белән беррәттән районда төрле халык бәйрәмнәрен оештыру һәм уздыру буенча актив эш алып бара. «Кач ману», «Җафрак бәйрәме», «Май чабу» “Питрау” кебек традицион бәйрәмнәр һәм төрле йолалар уздыралар.

Ансамбль даими рәвештә үзенең репертуары өстендә эшли. Керәшен халык җыруларын яшьләрне дә, өлкәннәрне дә җәлеп итерлек итеп , үзләренә күрә үзенчәлекле җиткерергә тырышалар. Болар барысы да киләчәк буынга борынгы җырларга мәхәббәт тәрбияләү, аларда халкыбызның сәнгатенә, тарихына карата патриотик хисләр тәрбияләү максатыннан эшләнә.

Коллективның иҗади эшчәнлеге тамашачыны битараф калдырмый, бәйрәм һәм шатлык атмосферасы тудыра, уңай хис-кичерешләр бирә, җәмгыятьне рухи баета һәм буыннар бәйләнешен ныгыта.

Ансамбленең сәнгать җитәкчесе Гизатуллина Ясминур Галиевна.