Кадер сәхнәсендә керәшен бәйрәмнәрен кадерләделәр

13 декабрь Зәй районының Кадер авылында "Милли бәйрәмнәр һәм уеннар. Уздыру формалары" дип аталган мәдәният хезмәткәрләренең семинары узды. Бу хакта Югары Баграж клубының җитәкчесе Гөлшат Хрипунова хәбәр итте. 

– Ай саен районның берәр авылы мәдәният йортында культура хезмәткәрләре өчен семинар уза. Бүгенгесе керәшен халкының традицияләре, милли бәйрәмнәре һәм аларны үткәрүгә багышланган иде. Коллегаларыбыз һәм мәктәп укучылары сәхнәдә төрле уеннар һәм чаралар күрсәтте. Араларында Питрау, Нардуган, Май чабу, Тройсын һәм Сабантуе да булды. Доклад формасындагы чыгышлар да булды, – дип сөйләде Хрипунова.

Шуны да искәртик, әлеге семинарлар циклы 2022 ел - Россиядә халык сәнгате һәм матди булмаган мәдәни мирас елы уңаеннан уздырылды. 

Фото: Верхнебагряжский сельский дом культуры