Фермерлар Харитоновлар терлекчелектә ун елдан артык

КФХ башлыгы билгеләвенчә, хуҗалыкта 300 баш мөгезле эре терлек исәпләнә, шуларның 130ы – савым сыерлар.

– 2013 елда откан грант средстволарына 100 баш сыерга ферма төзедек, 2019 елда кабат грант иясе булдык, ике йөз башка бинаны куллануга тапшырдык, – дип сөйли Георгий Харитонов.

Заманча бинада чиста, уңайлы. Сыер саву автоматлаштырылган, операторлар Светлана Михеева һәм Светлана Александрова үзләренең бурычларын намус белән башкаралар. Савылган сөт суыткыч җайланмасына озатыла.

– Сату белән проблема юк, – дип сүзгә кушыла Раушания Шәрифҗановна, – Яр Чаллының эшкәртү предприятиесе белән килешү төзелгән, алар үзләре килеп безнең продукцияне алып китәләр.

Иртәнге савымнан соң, һава торышы уңай торганда, терлекләрне көтүлеккә чыгаралар. Алар анда Рамил Габдуллинның ныклы сагы астында.
– Фермерлык – җаваплы, җиңел булмаган хезмәт, ләкин без аны сайлаганга үкенмибез. Бу безнең тормыш һәм безнең язмыш, – диләр Харитоновлар.

Менделеевск Яңалыклары