Хоккей җанатары Денис Богданов: “Ак Барс 100 процент җиңүче булачак!”

Билгеле булганча, 17 апрельдән бирле Россиянең иң популяр командалары Гагарин Кубогы өчен көч сынаша. Ак Барс һәм ЦСКА хоккей командалары арасындагы 6 уен нәтиҗәсе буенча исәп 3:3. Димәк, соңгы, хәлиткеч 7нче уен  Гагарин Кубогына кайсы команда ия булачагын ачыклаячак.

Җиңүне кем яулар? Уеннар гадел бәяләнерме? Бу сорауларны без Ак Барс җанатары, бала чагыннан хоккей белән мавыгучы Денис Богдановка бирдек.

“Хоккейны мин бала чагымнан яратып карыйм, үзенең тизлеге белән җәлеп итә ул мине. Үзем дә хоккей уйнап карадым. Әмма үземнең уенчы түгел, ә  фанат икәнемне аңладым. Ак Барс командасы өчен бик күптән җанатам, бөтен уеннарына диярлек йөрергә тырышам”, – дип әйтте ул.

Фанатлар арасында “уеннар сатып алынган”, “хоккей – маркетинг ул” дигән фикерләр дә йөри. Чыннан да, уенны трибуналардан карар өчен шактый зур сумма кирәк.

“Билетларга акчаны бер дә кызганган юк, андый эмоцияләрне миңа башка берни дә бирми. Беркайчан да уеннар сатып алынадыр дип уйлаганым юк. Кайчагында Ак Барска уңыш елмая, ә кайчагында – ЦСКАга. Бу юлы Ак Барсның җиңүче булачагына 100 процент ышанам, минемчә исәп 3:2 булыр. Башка вариантлар юк, безнең команда 4нче тапкыр Гагарин Кубогына ия  булачак!”, – дип сөйләде Денис.

Алинә Галимҗанова.