Чәбия зиратында өмә оештырдылар

Нина Еремина белән сеңлесе Ольга Григорьева һәм Ольганың улы Даниил, һәр елдагыча, каберлекләр өстен җыештырдылар. Әниләре Анна Храмованың  әле үзе исән чагында әйтеп калдырган "Чәбиябездән калган җан тетрәндергеч истәлек - зират бар. Зиратны күз карасыдай кадерләп тотуда күренә ул керәшеннәрнең бердәмлеге" дигән сүзләрен  кызлары үзләре өчен олы васыять итеп саныйлар...

Узган гасырның җитмешенче елларыннан соң беркемнең дә гәүдәсе җирләнмәгән Чәбия зиратының яртысы янәшәдә төзелгән тугыз катлы йорт нигезендә калган. Чәбия керәшеннәре зират янәшәсендә махсус стела-истәлек тактасы кую хыялы белән яшиләр...