Түбән Кама ягында яшәүче Вероника Бояровадан ураза ашлары рецепты

Уразаның асылы – кешенең чистарынуы һәм Рождество бәйрәмен лаеклы каршылавы.

Ураза вакытында билгеле бер диетаны үтәү белән генә түгел, тулысынча арулану мөһим.

Кеше өчен бу чорда үз рухи байлыгы өстендә эшләүгә – иман әйтүгә, изге кенәгәләр укуга, дөньяви кыйммәтләргә күбрәк игътибар бирергә тиеш.

Вероника Боярова чыгышы белән Зәй ягындагы Кадер авылыннан. Аңа сигез ай булганда, гаиләсе Түбән Кама районының Шәңгәлче авылына күченә. Балачагы, яшьлек еллары шунда уза. Хәзерге вакытта үзенең гаиләсе белән Байгол авылында яши. Ире Алексей белән өч бала тәрбиялиләр. “Тальяночка” һәм “Көмеш су” ансамбльләрен житәкли. Авыл, район һәм республика күләмендәге конкурсларда, фестивальләрдә катнашып, уңышлар яулый алар.

Вероника Фëдоровна бала чакта калган әбиле вакытларын еш искә ала: “Әби бездә йолаларга, динебезгә карата мәхәббәт тәрбияләргә тырышты. Җазыклардан сакланырга, иманнар укырга кирәклеген аңлатты. Әле бүгенгедәй хәтеремдә, уразага җәйдән үк әзерләнә башлый. Җиләк-җимеш, гөмбә җыеп киптерә. Көнбагыш, җитен майларын барлап куя. Көз көне бергәләшеп, күп итеп кәбестә тозлый идек”, – диде ул. Ураза вакытында үзе яратып пешерә торган берничә ризыкның рецептын да бирде.

Солы ярмасыннан котлет

Бер стакан вакланган солы ярмасы (овсяные хлопья), ике стакан кайнап торган су, бер бәрәңге, ике баш суган, бер кишер, бер-ике тырнак сарымсак, тәменчә тоз, яшел тәмләткечләр һәм кыздыру өчен май алабыз.

Ярма өстенә кайнап торган су салып, ярты сәгать чамасы тотабыз. Суган, кишер, бәрәңге һәм сарымсакны иттарткычтан чыгарабыз. Барлык компонентларны да кушабыз, тоз, тәмләткечләр өстибез, яхшылап болгатабыз һәм котлетлар ясыйбыз. Майда кыздырырга һәм пичтә пешерергә дә мөмкин.

Гөмбәле щи

Аны пешерү өчен кәбестә (тозланган булса да ярый), кишер, бәрәңге, гөмбә, сарымсак, суган, тоз, тәмләткечләр кирәк.

Гөмбәне югач, суга салабыз һәм әзер булганчы пешерәбез. Гөмбәне алгач, шулпасында кәбестә пешерәбез. Бәрәңгене шулпага салабыз. Кишер, гөмбә, суганны майлы табада кыздырабыз. Бәрәңге пешеп җиткәч, кыздырылган яшелчәне һәм тәмләткечләрне өстәп, тагын 10-15 минут кайнатабыз. Плитәне сүндергәч кенә, сарымсак салабыз. Өстен каплап бераз тоткач, шулпа әзер. Ашларыбыз тәмле, тоткан уразалар саваплы булсын!