Туганайлар

Рөстәм Миңнеханов авыл хуҗалыгы хезмәтчәннәре көненә багышланган тантанада катнашты

Бүген Татарстан Президенты Рөстәм Миңнеханов Казанның “Корстон” залында, республиканың авыл хуҗалыгы хезмәтчәннәрен һөнәри бәйрәмнәре белән котлады.

“Бу – чын мәгънәсендә зур, матур бәйрәм. Бүген без юлыбызда очраган киртәләргә, авырлыкларга, климат үзгәрешләренә карамастан, 3,8 млн тонна иген уңышы белән мактана алабыз. Сөт буенча да республика позициясе 1,8 млн тонна. 2 млн тоннадан артык шикәр чөгендере, 500 мең тоннадан артык ит — болар барысы да авыл хуҗалыгы хезмәтчәннәренең уңышы. Бу – биредә утыручы игенчеләр, терлекчеләр, механизаторлар, белгечләр, шулай ук авыл хуҗалыгы ветераннары хезмәте дә”, - диде Рөстәм Миңнеханов.

Президент “Урак – 2018” кампаниясенә өлеш керткән партнерларын да билгеләп үзды, инвесторларга да рәхмәт сүзләре ирештерде.

“Авыл ул – республиканың нигезе. Без авылда яшәгән кешеләргә таянабыз. Бүген республикада 450 мең шәхси хуҗалык, 4 мең 600 фермер хуҗалыгы, 1200гә якын гаилә фермасы бар. Бу – шулай ук безнең авылларга алга таба да үсү һәм чәчәк ату өчен кирәкле ресурс һәм байлык”, - диде Президент.

Рөстәм Миңнеханов авыл кешеләренә дә мөрәҗәгать итте: “Без авылдагы хезмәтнең җиңел түгеллеген аңлыйбыз. Бу процесста иң мөһиме – кешеләр. Алар – авыл тормышында, беренче планда кайнаучылар. Бүген бу кешеләрне хөрмәтләп, рәхмәт сүзләрен әйтәбез. 
Авыл хуҗалыгы ул – таяну ноктасы. Без аңа ярдәм итеп килдек һәм алга таба да ярдәм итәчәкбез. Барыгызны да һөнәри бәйрәмегез белән котлап, исәнлек һәм уңышлар телим. Киләчәктә дә республикабызда агросәнәгать тармагы алга барсын”, - диде Татарстан Президенты. Тәбрикләү сүзләреннән соң, Рөстәм Миңнеханов Татарстан Республикасы дәүләт бүләкләрен тапшырды.

Тантанада Дәүләт Киңәшчесе Минтимер Шәймиев, Татарстан Республикасы Авыл хуҗалыгы һәм азык-төлек министры Марат Әхмәтов һәм эре агросәнәгать предприятиеләре җитәкчеләре, шул исәптән, “Ак Барс” Холдинг” компаниясенең генераль директоры Иван Егоров, район башлыклары һәм авыл хуҗалыгы хезмәткәрләре катнашты. Чарада “Кряшен чибяре – 2018” Алиса Исакова, авыл хуҗалыгы күрсәткечләре буенча алдынгыларның берсе булган Мамадыш районын тәкъдим итеп, кунаклар өстәленә ипи чыгарды.

Мәгълүмат "Татар-инфорт" материалларыннан алынды
Салават Камалетдинов фотолары

Нравится
Поделиться:
Реклама
Комментарии (1)
Осталось символов:
  • 9 октябрь 2018 - 16:53
    Без имени
    Почему бы не выкладывать перевод в конце?