Идел буе федераль округы ярышларында Анастасия дә катнашты

Ярышлар чаңгы спортын популярлаштыру һәм алга таба үстерү, чаңгычылар осталыгын күтәрү максатыннан оештырыла. Ярышларда Башкортостан, Марий Эл, Мордовия, Удмуртия, Чувашия, Татарстан, Пермь, Киров, Нижегородский, Оренбург, Пенза, Самара, Ульяновксидан 190 чаңгычы осталыкларын сынады. Узышларны ачу тантанасында район башлыгы Разиф Кәримов, башкарма комитет җитәкчесе Илнар Хафизов, ТР чаңгы һәм биатлон федерациясе вице-президенты Эдуард Галиев, ике мәртәбә Олимпия чемпионы Тамара Тихонова катнашты.

Узышларның беренче көнендә чаңгычылар 10 һәм 15 чакрым арада классик стильдә узышты. Икенче көнне ун чакрым арага ирекле стильдә узышта Татарстан командасы составында чыгыш ясаган Станислав Попов III урын алды. Кызлар арасында 4 х 3 чакрымга эстафета ярышларында Татарстан командасы составында чыгыш ясаган Алинә Галимҗанова, Ирина Полежаева, Дарья Зубарева һәм Анастасия Утяганова II урын алды. Моңа кадәр алар IV-V урын белән чикләнә иде. Шунысы игътибарга лаек, эстафета ярышларында Татарстан командасының призлы урынга чыгуында Анастасиянең өлеше зур. Ул үз этабында көндәшләрен уза алды. Анастасия Утяганова политехник колледжның IV курс студенты. Ул - Сарсаз-Баграж кызы. Кечкенәдән авыл, аннан район чаңгы юлларында чыныгу алган кызны ярышларга тренер Сергей Колесов әзерли. Афәрин, Анастасия, спорт мәйданында уңышлар, казанышлар сиңа!

Ярыш нәтиҗәләре буенча Удмуртия командасы җиңү яулады. Пермь өлкәсе - II, Татарстан командасы исә III урын алды.

Рәзимә Кашапова,

"Зәй офыклары" газетасы