Язның беренче бәйрәме гүзәл затларыбыз кебек күркәм!

Кадерле хатын кызлар!

Татарстан Республикасы керәшен иҗтимагый оешмасы һәм үземнең исемнән сезнең барчагызны иң матур бәйрәмнәрнең берсе - 8 март - Халыкара хатын-кызлар көне белән чын күңелдән тәбрик итәм!

Язгы кояш нурлары һәм сезнең елмаюыгыз белән яктыртылган бу көнне көтеп алабыз, чөнки ул сезне, гүзәл затларыбызны олылау, игътибар күрсәтү көне.

Безнең хатын-кызларыбызның авторитеты һәрвакыт югары булган. Бу бүген дә шулай: гүзәл затларыбыз һәр өлкәдә беренче булырга омтыла. Без хатын-кызларыбызның спорттагы олы казанышларына, мәдәнияттә, фәндә, бизнеста яулаган зур уңышларына сокланып карыйбыз. Татарстан хатын-кызлары социаль һәм политик тормыштан читтә калмый, төрле комитетлар һәм оешмаларда нәтиҗәле эшлиләр.

Тормышыгыз шатлык белән тулсын, якын кешеләрегез кадерегезне белеп яшәсен. Безнең кыштан арыган йөрәкләргә яз җылысы булып керүче бүгенге бәйрәм сәламәтлек, бәхет һәм бәрәкәт китерсен!

Татарстан Республикасы керәшен иҗтимагый оешмасы идәрәсе җитәкчесе Егоров Иван Михайлович