Свияжск утраучыгында “Бәрмәнчек бакчасы” чәчәк атты

Барлык карендәшләрне керәшеннәрнең йөзек кашы булган "Бәрмәнчек" дәүләт фольклор ансамбле үз "бакчасына" җыйды.

Бер шигебез юк - бу зур вакыйганы оештырырга Ходай үзе булышты. Синоптиклар яңгыр фаразласалар да, аның бер генә тамчысы да Җиргә төшмәде. Калын болытларны тарата-тарата кояш елмайды. Табигатьнең начар һава торышы булмый, диләр. Чыннан да, көзгә авышкач, җилләр бераз кырыслана инде ул. Утрау булгач, бигерәк тә сизелде аларның салкыны. Шөкер, бәйрәмнең ямен алмадылар. Тарихи, изге, матур урыннар күп Свияжскта. Мәһабәт чиркәүләр, храмнар. Чәчәкләрнең ниндие генә юк - алы, кызылы, зәңгәре, сарысы... Уттай янып утыручы миләшләр... Өлгергән җиләк-җимешләр... Ә һаваларда ак күгәрченнәр йөзә... Тирә-якта үзәкләргә үтеп керүче чаң тавышлары, Алланы данлаучы иман җырулары яңгырый. Шушыдыр ул, Оҗмах бакчасы!..

Фестиваль беренче тапкыр гына уздырылса да, Татарстаннан гына түгел, Россия буенча да катнашучылар күп килгән иде. Чиләбе, Самара өлкәләреннән килгән олы яшьтәге түтиләрдән кала, республиканың төрле районнарыннан балалар коллективлары да фестивальдә иман җырулары җырладылар. Һәрбер якның үз көе, сүзләре, ләкин алар барысы да Алланы зурлый, данлый. Бүтән беркемдә дә булмаган, уникаль җырулар яңгырады бүген. Катнашучыларның барысына да Диплом белән истәлекле бүләкләр тапшырылды.

Самара өлкәсеннән "Натукай" ансамбле

"Бәрмәнчек" ансамбле егетләре һәм кызлары - фестивальнең хуҗалары - бәйрәмнең иң матур бизәкләре. Аларның иман җырулары күңел кылларын тибрәтә, биюләре йөрәкләрне җилкендерә.

Тулырак материалны газетабызның киләсе саныннан укырсыз. Фестивальдән фоторепортаж тәкъдим итәбез.

Видеода "Бәрмәнчек бакчасы" фестивале гимны