Сәрдә кызлары булдыралар!

Кызлар ике төркемгә бүленде. Олылар төркемендә Катя Максимова һәм Марина Ермолаева, ә кече төркемдә Регина Мухина, Марина Морозова, Оксана Ермолаева һәм Мария Ермолаева үзара көч сынашты. Иң беренче кызлар үзләрен төрле яктан ачып, күрсәтеп бирделәр. Керәшен халык җырлары, биюләре дә бик оста башкарылды. Танылган керәшен язучылары, җырчылары, уен - йолаларына караган конкурста кызларның тапкырлыкларын күрдек. Айдар Маннапов һәм Мухина Марина алып барган әлеге кичә бик күңелле барды.

Сынаулар арасында Кашапова Иделия, Мухина Марина, Маннапов Айдар үзләренең матур чыгышлары белән тамашачыларны сөендерделәр. Конкурста олылар төркемендә Максимова Катя, ә кече төркемдә Мухина Регина җиңү яулады. Катя узган ел Мамадыш районы Җөри авылында үткән Питрау бәйрәмендә "Керәшен чибәре" конкурсында да катнашкан иде. Жюридә утырган "Сәяр" төркеме кызлары конкурсантларга үзләренең төгәл бәяләрен бирде. Тамашачылар рәхәтләнеп ял итте, өлкәннәр йолалар онытылмавын күреп, чын күңелдән сөенде. Ни әйтсәң дә, булдыралар безнең Сәрдә кызлары!