Сарсаз- Багражда “Кышкы Микула”ны билгеләп үттеләр

Кунакларны урамнан ук ипи-тоз, кайнар чәй, табадан яңа төшкән коймак белән каршы алдылар. Керә-керешкә Баграж авыллары жиңгиләре пешергән берсеннән-берсе тәмле ризыклар тезелгән өстәлләр сыгылып тора. Керәшеннәр җыелышкан җирдә җыр-биюсез буламыни?! Зур түгәрәк ясап, "Подгорный" көенә рәхәтләнеп сиптерделәр генә такмакларны. Дәртле җырлар, биюләр дөнья мәшәкатьләрен оныттырып, күңелләрне җилкендерде, бергәлекне, рухи якынлыкны арттырды, диделәр бәйрәмдә катнашучылар. Җирле артистлар Кышкы Микуланың асылын бары бергәлектә, татулыкта гомер кичергәндә, бергәләшеп эшләп тапканда гына тормыш бөтен, тапкан мал бәрәкәтле булуын сәхнәләштергән күренеш аша җиткерүне үзләренә максат итеп куйганнар һәм аңа ирешелгән дә.