Иманга кайту юлында

Инде язганыбызча, 9 июль көнне Казанның Тихвин чиркәвендә урнашкан керәшен приходы үзенең 25 еллык юбилеен билгеләп узды.

8 июль көнне храмда бәйрәм Литургиясе узды. Һәр елдагыча, аны керәшен телендә митрополит Анастасий алып барды. Аңа приход настоятеле протоиерей отец Павел, бөтен республикадагы керәшен приходларыннан килгән священниклар булышты.

Бәйрәм службасына Казаннан гына түгел, республиканың башка төбәкләреннән дә прихожаннар җыелган, республика керәшен оешмасы идарәсе членнары килгән иде. Бу көнне чиркәүгә Республика керәшен оешмасы җитәкчесе, Татарстан дәүләт Советы депутаты Иван Егоров та килде. Ул Владыка Анастасийны, приход настоятеле отец Павел Павловны, барча прихожаннарны юбилей белән котлап, храмга Тихвин Алла Анасы иконасын бүләк итте.

Митрополит Анастасий Алла ярдәме белән республикабызда чиркәүләрнең торгызылуы турында әйтте. "Шушы көннәрдә республикада исәбе буенча утыз икенче керәшен чиркәве аруландырылачак", - диде ул. Шул ук вакытта, бу әле чиркәүләр ачылган җирләрдә дини тормышның яңаруы, дигән сүз түгел. "Без Ходайдан чиркәүләрнең тышкы матурлыгын торгызуны гына түгел, ә ачылган чиркәүләрнең ябык тормавын, келәүләрнең торымнан-торымга гына үткәрелмәвен дә сорыйбыз. Һәрбер ачылган храм - шул авылның йөрәге. Йөрәк тибә икән - гәүдәбез дә яши, дигән сүз, ә безнең гәүдәбез ул - Христосның Чиркәве. Шуңа күрә, чиркәүләребезнең тышы гына ялтырамыйча, эчке тормышлары да тиешенчә булсын иде", - диде ул.

Келәү беткәннән соң, Владыка Анастасий һәм кунаклар Казан шәһәре керәшен оешмасы көче белән чиркәү территориясендә оештырылган музей-выставканы да карадылар.

Людмила БЕЛОУСОВА