Зинаида Захарованың яңа китабы чыкты

Зинаида Захарова

Ашханәгә килегез!

Ашханә ачып җибәрдем

Кошларга салкын кышта.

Аларны кызганмаганга

Бик ачуландым кышка.

Усалланып беткәнсең, дип,

Каты шелтә белдердем.

Шул арада кошчыкларны

Чакырырга өлгердем.

Очып килеп тә җиттеләр

Кунакларым, чыр-чулап.

Алар өчен көтелмәгән

Ашханә бу чын-чынлап.

Ачтан интеккән булганнар,

Шуңа да бик кызгандым.

Тиз арада мин аларның

Ышанычын казандым.

Миннән курыкмас булдылар,

Очалар да төшәләр.

Алар тәмле әйбер алып

Чыкканымны көтәләр.

Салкыннардан, кошчыкларым,

Сез саклана күрегез.

Ашханәм ишеге ачык,

Кыенсынмый керегез.

Хәйран калырлар

Кечкенә генә балыкны

Кем өйрәткән йөзәргә?

Әйтеп бирер иде дә ул,

Теле юк шул сөйләргә.

Минем дә шул балык кебек

Килә суга чумасым.

Балык булу бик тә ошар,

Килмәс судан чыгасым.

Их, чумармын елгабызга,

Балыкларны уздырып.

Бар дусларым карап торыр,

Хәйран калып, кызыгып.

Кычыткан чыпчыгы

Әби әйтә: "Кызым, син,- ди, -

Гел кычыткан чыпчыгы.

Башыма капты тавышың,

Яратасың чыр-чуны".

"Хәзер үк күрсәт, әби,- дим,-

Кычытканның чыпчыгын".

"Үзе очып килеп керер,

Ачып куй,- ди, капчыгың".

Капчыгым юк, бар ич букчам,

Ачып куйдым да көтәм.

Әби әйтә: "Соңга калдың,

Ул күптән очып киткән".

Ә үзе елмаеп йөри,

Ышанмадым шуңа да.

"Ничек ерак очсын ул,- дим,-

Кычытканы шунда ла".

"Чыпчыгым" дип, әби миңа

Яратып кына әйткән.

Кычытканда сыерчык та,

Чыпчыклар да юк икән.

Виктория дәрес бирә

Виктория - зур кыз, көздән

Беренчегә бара ул.

Укый, яза, рәсем ясый,

Бик сәләтле бала ул.

Шәһәр кызы, ә шулай да

Авылны бик ярата.

Безне сагынып, җәйләрен

Ел да кунакка кайта.

Җәйне сездә үткәрәм, дип,

Әй шатландыра мине.

Компьютер серләренә дә

Өйрәтермен, ди, сине.

Йокысыннан уянуга,

Планшеты кулында.

Һич кенә дә белеп булмый

Ни икәнен уенда.

Өр-яңа әлифба алдым

Бүләк итеп кызыма.

Тизрәк шатландырыр өчен,

Суздым нәни кулына.

Яле, укып күрсәт, дидем,

Китапны куйдым ачып.

Күзләр уянмаган, диеп,

Шартлатып куйды ябып.

Дәресне, әби, син түгел,

Хәзер мин үзем бирәм.

Заманадан артта калма,

Тиз бул, айпадны өйрән.

Дәрес бирә Виктория,

Укучы мин - әбисе.

Өйрәндем дигәндә генә,

Кайтып алды әнисе.